पोखरा । नेपाली कांग्रेसका सहमहामन्त्री डा. प्रकाशशरण महतले सरकार मनपरीतन्त्रले चलेको आरोप लगाएका छन् ।
कांग्रेसको राष्ट्रिय जागरण अभियानको शनिबार पोखरामा समापन गर्दै उनले जनभावनाअनुसार काम नगरी मनपरीतन्त्रले सरकार सन्चालन भइरहेको बताए ।
नेता महतले सरकारमा रहेकाहरु नै भ्रष्टाचारमा संलग्न रहेपनि उनीहरुको प्रतिरक्षामा सरकार उत्रिएको जिकिर गरे ।
आफैं भ्रष्टाचार गर्ने आफैं छानबिन गर्दा भ्रष्टाचार मौलाउँदै गएको उनको भनाइ थियो । वर्तमान सरकारले प्रेसमाथि आक्रमण गरी अभिव्यक्ति स्वतन्त्रता खोस्न खोजेको आरोपसमेत उनले लगाए ।
यसअघि, पोखराको पृथ्वीचोकबाट सुरु भएको र्याली नयाँबजार, महेन्द्रपुल हुँदै चिप्लेढुंगा, बीपीचोकमा पुगेर सभामा परिणत भएको थियो ।
गएको वैशाख २५ गतेदेखि सुरु पहिलो चरणको जागरण अभियान देशका ७७ ओटै जिल्लामा एक महिना चलेको हो ।
शनिबार देशभरि नै कार्यक्रमको आयोजना गरी पहिलो चरणको जागरण अभियान कार्यक्रम समापन गरिएको कांग्रेसले जनाएको छ ।