गाउँको चिया पसलमा
सदा झैं थिएँ उपस्थित
र पर्खिरहेको थिएँ एक कप चिया ।
दाइ, भाइ, काका र बाजेहरु
कोही चिया पर्खिरहेका थिए
कोही चिया पिइरहेका थिए
पसलमा सदा झैं
तातो चिया थियो
र, तातै गफ थियो ।
कुर्सी हल्लाउंदै मैंले भने– हाम्रो गाउँमा कोरोना छैन
बेन्चीको छेउबाट बृद्ध काकाले भने–
हो बा, कोरोना छैन तर गाउँमा नेताहरु छन् ।
तातो चिया चुपचाप मुखमा खन्याएर
म घर तिर ओरालो झरें ।
सुनापति, रामेछाप